رژیمی‌ كۆماری‌ ئیسلامی‌ به‌ درێژایی‌ 3 ده‌یه‌ی‌ رابردوو هه‌وڵیداوه‌ به‌ ئیعدام و گرتن و ئه‌شكه‌نجه‌ كردنی‌ لاوانی‌ خه‌باتكاری‌ كوردستان، بزووتنه‌وه‌ی‌ حه‌قخوازانه‌ی‌ گه‌لی‌ كورد سه‌ركوت بكات و به‌مجۆره‌ پێش به‌ هه‌موو مافه‌كانی‌ خه‌ڵكی‌ كوردستان بگرێت.

  سه‌ره‌ڕای‌ گۆڕانی‌ بارودۆخ، هه‌تا ئێستاش له‌ كوردستان ئیعدامی‌ سیاسی‌ به‌ ره‌سمی‌ جێبه‌جێ‌ ده‌كرێت و هه‌تا ئێستاش خه‌باتكارانی‌ كوردستان له‌ ئه‌شكه‌نجه‌گاكانی‌ رژیمدا و له‌ ژێر وه‌حشیانه‌ترین ئه‌شكه‌نجه‌دا گیان له‌ده‌ست ده‌ده‌ن. گیانبه‌خت كردنی‌ ئیبراهیم لوتفوڵاهی‌ دوایین نموونه‌ی‌ ئه‌م سه‌ركوتگه‌ریه‌ی‌ كاربه‌ده‌ستانی‌ كۆماری‌ ئیسلامیه‌ له‌ كوردستان.

  كۆمه‌ڵه‌ به‌ بۆنه‌ی‌ ئه‌م رووداوه‌ دڵته‌زێن و دژ به‌ مافه‌ مرۆییه‌كان، به‌ گه‌رمی‌ سه‌ره‌خۆشی‌ له‌ بنه‌ماڵه‌ی‌ ئیبراهیم لوتفوڵاهی‌ و هه‌موو خوێندكاران به‌گشتی‌ ده‌كات و خۆی‌ به‌ شه‌ریكی‌ خه‌میان ده‌زانێت.

  هه‌روه‌ها داوا له‌ هه‌موو خه‌ڵكی‌ كوردستان و رێكخراوه‌ جه‌ماوه‌ری‌ و مه‌ده‌نی و خوێندكاریه‌كان ده‌كه‌ین به‌ توندی‌ له‌ به‌رامبه‌ر ئه‌م جه‌نایه‌ته‌ تازه‌یه‌ی‌ رژیمدا هه‌ڵوێست بگرن و به‌ هه‌موو شێوه‌یه‌ك له‌ دژی‌ بوه‌ستنه‌وه‌ و خوازیاری‌ ناساندنی‌ بكوژان و به‌ سزا گه‌یاندنیان بن.

  هاوكات داوا له‌ هه‌موو رێكخراوه‌ جیهانیه‌كانی‌ پارێزه‌ری‌ مافی‌ مرۆڤ ده‌كه‌ین ئه‌م تاوانه‌ی‌ رژیمی‌ ئیسلامی‌ له‌قاو بده‌ن و حكوومه‌تی‌ كۆماری‌ ئیسلامی‌ بخه‌نه‌ ژێر گوشاره‌وه‌ و له‌ ناوه‌نده‌ جیهانیه‌كاندا مه‌حكوومی‌ بكه‌ن و بۆ سزادانی‌ بكوژان و تاوانكاران‌ هه‌وڵ‌ بده‌ن.

  جارێكی‌ دیكه‌ سه‌ره‌خۆشی‌ له‌ بنه‌ماڵه‌ی‌ ئیبراهیم لوتفوڵاهی‌ ده‌كه‌ین و پڕ به‌ دڵ‌ خۆمان به‌ شه‌ریكی‌ خه‌می‌ له‌ده‌ست چوونی‌ ئه‌م خوێندكاره‌ تێكۆشه‌ر و خه‌باتكاره‌ ده‌زانین و دڵنیایان ده‌كه‌ین خه‌باتكارانی كوردستان یادی به‌رز و به‌ڕێز راده‌گرن.

  كۆمیته‌ی‌ رێبه‌رایه‌تیی‌ كۆمه‌ڵه‌_ره‌وتی‌ چاكسازی‌

  29ی‌ به‌فرانباری‌ 1386ی‌ هه‌تاوی‌

  رێكه‌وتی‌ 19ی‌ ژانویه‌ی‌ 2008ی‌ زایینی